Kesyon Souvan

Repons ak kesyon ou gen anvan w kòmanse.

Sa k rive si m pa peye apre 14 jou esè gratis la?

App la pa bloke ditou. Li antre nan yon mòd lekti sèlman: ou ka toujou wè tout done ou (vant, rapò, kliyan, elt.), men ou pa ka kreye oswa modifye anyen nouvo jiskaske w aktive yon kòd lisans. Done ou pa janm pèdi.

Èske PotoBiz mache san entènèt nèt?

Wi, si w chwazi travay an Mòd Lokal. Done yo sove dirèkteman sou aparèy ou (fichye .ptb), san okenn koneksyon obligatwa.

Èske gen limit sou kantite pwodwi oswa vant mwen ka antre?

Non, pa gen limit, ni pandan esè gratis la, ni apre.

Kijan pou m fè yon sovgad done mwen yo?

Ale nan Paramètres → Exporter une Sauvegarde. Nou rekòmande fè sa regilyèman, menm si w gen Cloud aktive.

Èske m ka chanje tip biznis mwen apre m fin kòmanse?

Wi, ou ka ajiste sa nan Paramètres. Sepandan, li pi senp chwazi bon tip la depi kòmansman pou evite rekonfigire modil yo.

Sou ki aparèy PotoBiz mache?

Windows ak Android, sa gen ladan tablèt Android tou, paske app la adapte otomatikman ak gwosè ekran an. Si w aktive Cloud, menm kont lan ka itilize sou tou de an menm tan, ak done ki senkwonize otomatikman.

Kisa yon fichye .ptb ye?

Se fichye ki kenbe yon biznis konplè an mòd lokal: vant, pwodwi, kliyan, elt. Ou ka kreye plizyè fichye .ptb pou jere plizyè biznis apa sou menm aparèy la, oswa pataje youn pa kopi USB/imèl.

Èske m ka jere plizyè biznis ak yon sèl kont?

Wi, swa ak plizyè fichye .ptb apa (mòd lokal), swa ak plizyè kont Cloud diferan si w vle yo separe nèt.

Kijan pou m peye lisans lan?

Pou kounye a, kontakte nou sou WhatsApp (gade paj Pri a) pou aktive lisans ou manyèlman. Peman an liy pa MonCash ap vini byento.